အွန်လိုင်းတွင် ပျံနှံ့ခဲ့သည့် ရုပ်သံဖိုင်ပါ ဒေါ်တင်ညွန့် အပါအ၀င် ဒေသခံ ခုနှစ်ဦးအား ကညွတ်ကွင်းနယ်မြေရဲစခန်းမှ ပုဒ်မ ၃ ခုဖြင့်အမှုဖွင့်

အွန်လိုင်းတွင် ပျံနှံ့ခဲ့သော ရုပ်သံဖိုင်တွင် ဒေါ်တင်ညွန့်အား တွေ့ရစဉ်

အွန်လိုင်းတွင် ပျံနှံ့ခဲ့သည့် ရုပ်သံဖိုင်ပါ ဒေါ်တင်ညွန့် အပါအ၀င် ဒေသခံ ခုနှစ်ဦးအား ဆဲဆိုကြိမ်းမောင်းမှု၊ အားပေးကူညီမှု စသော ပုဒ်မ သုံးခုဖြင့် အမှုဖွင့် အရေးယူထားကြောင်း ကညွတ်ကွင်းနယ်မြေ ရဲစခန်းမှ သိရသည်။

“သူတို့ကို အမှုဖွင့်ထားတာ ဟုတ်ပါတယ်၊ ၂၉၄ ၊ ၅၀၆၊ ၁၁၄ နဲ့ဖွင့်ထားတယ်၊ ဆဲတာဆိုတာကို ၂၉၄ နဲ့၊ ၅၀၆ က ဆဲဆို ကြိမ်းမောင်းတာပေါ့၊ ၁၁၄ က အားပေးကူညီတာ သူက အများနဲ့ပေါ့၊ အားလုံးပေါင်း ၇ ယောက်ကို ဖွင့်တာ၊ သူတို့က အပြန်အလှန်ဗျ၊ စားကျက်မြေတွေ နွားကျောင်းတဲ့ဟာတွေ ဘာတွေနဲ့ရှုပ်နေတာ ဖြစ်စဉ်ကတော့ အဲ့လို သူတို့က တစ်ရွာထဲသားတွေ” ဟု ကညွတ်ကွင်း နယ်မြေရဲစခန်းမှ တာဝန်ရှိသူ တစ်ဦးက ပြောကြားသည်။

ဖြစ်စဉ်မှာ ပြီးခဲ့သည့် ဇွန် ၉ ရက် နံနက် ၁၀ နာရီခွဲ အချိန်ခန့်က ကညွတ်ကွင်း နယ်မြေရဲစခန်းအပိုင် သပြေလဟာကျေးရွာအုပ်စု ရွာမကြီးကျေးရွာနေ ကိုဝင်းအေး ၁၉ နှစ် (ဘ)
ဦးထွန်းမှန်သည် ရွာအနောက်ပိုင်းရှိ စားကျက်မြေအတွင်း၌ ၄င်းပိုင် နွား ၄ ကောင်းအား လွှတ်ကျောင်းထားခဲ့ကြောင်း သိရသည်။ ထိုသို့လွှတ်ကျောင်းနေစဉ်
တစ်ရွာထဲနေ ဦးရဲဝင်း ၅၄ နှစ်(ဘ) ဦးထွန်းရွှေ၊ ကိုညှက်စိ ၃၂ နှစ် (ဘ)ဦးနီ၊ မတင့် ၄၀ နှစ်(ဘ) ဦးချစ်မြ ကျဘမ်းလုပ်၊ မမေရှယ် ၁၉ နှစ်(ဘ) ဦးအောင်စိုးမိုး၊
ကိုအောင်ကျော်ဝင်း ၂၇ နှစ် (ဘ) ဦးသန်းလှိုင် တို့မှ ၄င်းတို့ စိုက်ပျိုးထားသည့် စပါးပင်များအား နွားများမှ ၀င်ရောက် စားသောက်သည်ဟုဆိုကာ ကိုဝင်းအေးအား ညစ်ညမ်းစွာဆဲဆို
ခဲ့သည့်အပြင် ကိုအောင်ကျော်ဝင်းမှ အသင့်ပါလာသော တစ်တောင်ခန့်ရှိသည့် ဓားကုတ်ချွန်းနှင့် လိုက်သဖြင့် ကိုဝင်းအေးမှာ ထွက်ပြေးခဲ့ရကြောင်း ကညွတ်ကွင်း နယ်မြေရဲမှတ်တမ်းအရ သိရသည်။

ဆက်လက်ပြီး ဇွန် ၁၀ ရက် နေ့လည် ၁ နာရီ အချိန်ခန့်ကလည်း ကိုဝင်းအေးမှ တစ်ရွာထဲအတူနေ ဒေါ်ထွေးစိန် ၅၀ နှစ် (ဘ) ဦးတင်သောင်း၊ မစန်းအေး ၅၆ နှစ် (ဘ) ဦးသောင်းငွေ၊
မမာသီ ၃၃ နှစ် (ဘ) ဦးအောင်တူးတို့နှင့်အတူ ၄င်းစားကျက်မြေအတွင်း၌ နွားများအား ကျောင်းထားစဉ် ဦးရဲဝင်း၏ ဇနီးဖြစ်သူ ဒေါ်တင်ညွန့် ၆၀ နှစ် (ဘ) ဦးခွေးပုနှင့် ၄င်း၏ သမီးဖြစ်သူ မသက်သက်ဦး ၂၉ နှစ် (ဘ) ဦးရဲဝင်းတို့ နှစ်ဦးမှ ရောက်ရှိလာကာ ကိုဝင်းအေး အား ညစ်ညမ်းစွာ ဆဲဆိုကြိမ်းမောင်းခြင်း၊ ဒေါ်တင်ညွန့်မှ ထမိန်လှန်ပြခြင်းများ ပြုလုပ်ခဲ့ကြောင်း ကညွတ်ကွင်း နယ်မြေရဲစခန်း၏ ရဲမှတ်တမ်းတွင် ဖော်ပြထားချက်အရ သိရသည်။

အဆိုပါ ပြသာနာများနှင့် ပတ်သက်၍ ကျေးရွာရာအိမ်မှူး ဦးတင်ထွေးမှ နှစ်ဦးနှစ်ဘက် ပြေလည်စေရန် ကျေးရွာတွင် ခေါ်ယူညှိနှိုင်းဖြေရှင်း ဆောင်ရွက်ပေးခဲ့သော်လည်း ပြေလည်မှု မရရှိသောကြောင့်၊ ဆဲဆိုကြိမ်းမောင်းခံရသူ ကိုဝင်းအေးမှ ဒေါ်တင်ညွန့်အပါအ၀င် ၇ ဦးအား ဥပဒေအရ အရေးယူပေးရန် ဇွန် ၁၃ ရက်က အမှုဖွင့် တိုင်ကြားခဲ့သဖြင့် (ပ) ၁၅၇/၂၀၁၇၊ ပြစ်မှုပုဒ်မ ၂၉၄/၅၀၆/၁၁၄ တို့ဖြင့် အမှုဖွင့် အရေးယူထားခဲ့ကြောင်း သိရသည်။

Eleven