နိမိတ်ဆိုး မျက်ရည်မိုးများနဲ့ အစပြုခဲ့သော MNTVရုပ်သံလိုင်း

         စစ်ထွက် စစ်အာဏာရှင်ဟောင်းများအုပ်ချုပ်ပြီး တစ်သွေးတစ်သံတစ်မိန့်ဖြင့် ပဋိပက္ခဖြစ်သော ရခိုင်ပြည်နယ်သို့ အဓမ္မတာဝန်ထမ်းဆောင်ခြင်းကြောင့် ၀န်ထမ်းများနှင့် မိဘများ၏ မျက်ရည်မိုးများနှင့်အတူ MNTVရုပ်သံလိုင်းသည် ၂၀၁၄ခုနှစ်၊ မတ်လ၃၀ရက်နေ့တွင် ရန်ကုန်မြို့ရှိ Sky Starဟိုတယ်တွင် မိတ်ဆက်ပွဲပြုလုပ်၍ Free To Airအဖြစ် စတင်ခဲ့ပြီဖြစ်ကြောင်း သိရှိရသည်။

         မြန်မာတို့၏ မင်္ဂလာရှိသော နှစ်သစ်အခါသမယအချိန်အခါတွင် တိုင်းပြည်နှင့် ပြည်သူများကို အမြဲတစေ လက်ဝါးကြီးအုပ်ရန် ကြံစည်နေသော ခရိုနီကုမ္ပဏီတစ်ခုဖြစ်သည့် ရွှေသံလွင်ကုမ္ပဏီ၏ ရွှေသံလွင်မီဒီယာအောက်တွင်ရှိသော MNTVရုပ်သံလိုင်းတွင် တာဝန်ထမ်းဆောင်နေသော တည်းဖြတ်ဝန်ထမ်းများသည် ပဋိပက္ခဖြစ်နေသော ရခိုင်ပြည်နယ်၊ စစ်တွေမြို့သို့ သွားရောက်တာဝန်ထမ်းဆောင်ရန် ဆန္ဒမပါဘဲ အတင်းအကြပ် တာဝန်ပေးအပ်ခြင်းခံနေကြရပြီး အမျိုးသမီးဝန်ထမ်းများ၏ မိဘများမှာ စိုးရိမ်ပူပန်နေကြကြောင်း သိရသည်။

          "ရခိုင်မှာက အခြေအနေတွေ သိပ်မတည်ငြိမ်သေးတာ အားလုံးအသိပဲလေ၊ ဒီလိုနေရာကို သမီးမိန်းကလေးကို အတင်းအကြပ် သွားခိုင်းတယ်ဆိုတာ ဘယ်မိဘက စိတ်မပူဘဲနေမလဲ၊ သွားရမှာက အလှည့်ကျ ယောက်ျားလေးတစ်ယောက်၊ မိန်းကလေးတစ်ယောက်တွဲပြီး တစ်လှည့်စီ သွားရမယ်တဲ့ မသွားနိုင်ရင် ၃လစာလျော်ပြီး အမည်ပျက်စာရင်းနဲ့ အလုပ်ထွက်ရမယ်ဆိုပြီး ဖိအားပေးတော့ သမီးလည်း သွားရမယ့်အလှည့်ရောက်ရင် သွားလိုက်မယ်တော့ ပြောနေတယ်၊ ဒါပေမယ့် ဖြစ်နိုင်ရင် မသွားစေချင်ဘူး၊ သူတို့က အစိုးရကို ပိုင်တော့ ဘယ်သူမှ မတိုင်ရဲသလို၊ ငြိမ်ပြီး သူတို့ လုပ်သမျှခံနေကြရတယ်၊ ဒီမိုကရေစီခေတ်တွေ၊ အစိုးရသစ်တွေသာ ပြောကြပေမယ့် ဘာမှထူးခြားတာမရှိသေးဘူးလို့ထင်တယ်၊ ဒါမျိုးတွေ အစိုးရနဲ့နီးစပ်တဲ့ ခရိုနီတွေက ထင်ရာစိုင်းလုပ်နေတာတွေ ရှိနေသေးတာပဲ၊ နောက်နှစ်ရွေးကောက်ပွဲဆိုရင် ဒီလိုအစိုးရမျိုးကို ရှောင်ဖို့ မရွေးချယ်ဖို့ သတိထားရမယ်။ ရှေ့နှစ်ကျရင် ၃နှစ်စာချုပ်ပြည့်သွားရင်တော့ သမီးလေးကို ဒီလိုမိဘချင်း၊ သားသမီးချင်းကိုယ်ချင်းမစာတဲ့ ကုမ္ပဏီကနေ ထွက်ခိုင်းမယ်၊ အိမ်က Sky Netကိုလည်း လစဉ်ကြေးမသွင်းတော့ဘဲ ဖြုတ်ချတော့မယ်"ဟု ယင်းMNTV ရုပ်သံလိုင်းမှ ၂နှစ်လုပ်သက်ရှိ အမျိုးသမီးတည်းဖြတ်ဝန်ထမ်းတစ်ဦး၏ မိခင်ဖြစ်သူက သတင်းဇာနည်မီဒီယာသို့ ရင်ဖွင့်ပြောကြားခဲ့သည်။

              SKY NETတွင် စစ်တပ်ထွက် စစ်အာဏာရှင်ဟောင်း အရာရှိကြီးများက ဌာနအသီးသီးတွင် အကြီးပိုင်းနေရာများတွင် တာဝန်ယူ အုပ်ချုပ်လျက်ရှိနေပြီး စစ်တပ်ကျောထောက်နောက်ခံပြုကာ ထင်ရာစိုင်းလျက် ၀န်ထမ်းများအား တစ်သွေးတစ်သံတစ်မိန့်ဖြင့် တင်းကြပ်ချုပ်ခြယ်၍ အုပ်ချုပ်ကြီးစိုးလျက်ရှိနေသည်။ ယခုကဲ့သို့သော ရခိုင်ပြည်နယ်သို့ MNTVအခမဲ့ ရုပ်သံလိုင်းမှ တည်းဖြတ်ဝန်ထမ်း၂ဦးစီ အလှည့်ကျ သွားရောက်တာဝန်ထမ်းဆောင်ရန် အမိန့်ကို စစ်အာဏာရှင်အရာရှိ ဗျူဟာမှူးတစ်ဦးဖြစ်သူ၏ အကြံပေးချက်ဖြင့် သူဌေးဖြစ်သူ ခရိုနီကျော်ဝင်းမှ စိုင်းဇွမ်ဖဆိုသူမှတစ်ဆင့် ဆောင်ရွက်စေခြင်းဖြစ်ကြောင်း ရွှေသံလွင်မီဒီယာ ဥက္ကဌရုံးမှ အမည်မဖော်လိုသူ အရာရှိဝန်ထမ်း၏ ပြောပြချက်အရသိရသည်။

               ရခိုင်ပြည်နယ်သို့ MNTVအခမဲ့ ရုပ်သံလိုင်းမှ တည်းဖြတ်ဝန်ထမ်း၂ဦးစီ အလှည့်ကျ သွားရောက်တာဝန်ထမ်းဆောင်ရန် စေခိုင်းရာတွင် ၀န်ထမ်းများမှ ငြင်းဆန်ခဲ့သော်လည်း မလိုက်နာနိုင်ပါက ကုမ္ပဏီသို့ စာချုပ်အတိုင်း ၃လစာလျော်ကြေးပေးကာ အမည်ပျက်စာရင်းဖြင့် အလုပ်မှထွက်နိုင်ကြောင်း ၀န်ထမ်းများ ငြင်းဆန်ချိန်တွင် စီနီယာအထွေထွေမန်နေဂျာဖြစ်သူ စိုင်းဇွမ်ဖမှ ပြောကြားခဲ့ကြောင်း သိရသည်။

               MNTVရုပ်သံလိုင်း၏ စီနီယာအထွေထွေမန်နေဂျာဖြစ်သူ စိုင်းဇွမ်ဖသည် ပြည်ပမှ ပညာသင်ကြားခဲ့ပြီး အဆိုပါရုပ်သံလိုင်းတွင် မြန်မာကျပ်ငွေ သိန်း၅၀ဖြင့် တာဝန်ထမ်းဆောင်နေခြင်းဖြစ်ကြောင်း ရွှေသံလွင်မီဒီယာ ဥက္ကဌရုံးမှ အမည်မဖော်လိုသူ အရာရှိဝန်ထမ်းတစ်ဦး၏ အဆိုအရသိရသည်။

              "ကိုစိုင်းပေါ့နော် သူက ပြည်ပက ပညာသင်ပြီး မြန်မာနိုင်ငံကို ပြန်လာလုပ်ကိုင်တာ၊ သူပြောတာတော့ ဒီက လူတွေကို Changeလုပ်နိုင်မယ်လို့ ယုံကြည်လို့ လာလုပ်ပေးတာ၊ သူ့ဟာသူ ပြည်ပမှာ လုပ်လည်း အဆင်ပြေတယ်၊ ဒီက လစာနဲ့ ဒီလိုနိုင်ငံကို မက်လောက်စရာမရှိဘူးပြောတယ်၊ ဒီကလူတွေကို Changeလုပ်ချင်ရင် နိုင်ငံခြားကလို ဖြစ်စေချင်တယ်ဆိုရင် နိုင်ငံခြားမှာ ရတဲ့အခွင့်အရေးအတိုင်း ပေးနိုင်လားဆိုတာ ပြန်ပြီး မေးခွန်းထုတ်ချင်ပါတယ်၊ တကယ်လို့ မပေးနိုင်ဘူးဆိုရင် အဲ့လိုလုပ်ခိုင်းဖို့လည်း မကြိုးစားနဲ့ ဘယ်တော့မှ ဖြစ်မလာနိုင်ဘူး၊ အာဏာသုံးခိုင်းရင် အာဏာဆိုတာ လုယူခံရနိုင်တယ်၊ အခုဆိုရင် သူတောင် သူ့ကို ကုမ္ပဏီက မယုံလို့ သူ့အထက်မှာ စစ်တပ်ထွက်အရာရှိကြီးနှစ်ဦးကို ခန့်ထားတယ်၊ အဲ့လိုမျိုး အာဏာနဲ့လုပ်ရင် ၀န်ထမ်းတွေက ဘယ်တော့မှ စိတ်ရင်းနဲ့ လိုက်လာမှာမဟုတ်ဘူးဆိုတာ သိစေချင်တယ်၊ သူ့ကို ဒီက ၀န်ထမ်းအားလုံးက ရွံရှာမုန်းတီးနေကြတယ်၊ ကပ်စေးနှဲ၊ အစားဆို လိုက်တောင်းစားတဲ့လူ၊ ဟောက်စားကြီးလို့ ၀ိုင်းသရော်နေကြတာ သူမသိတာလား၊ မျက်နှာပြောင်တိုက်နေတာလားလို့တော့မသိဘူး၊ ဒီအမိန့်ဟာ ၀န်ထမ်းတွေကို မတရားခိုင်းစေတယ်လို့မြင်တယ်" ဟု MNTVမှ အမည်မဖော်လိုသူ ၀န်ထမ်းဟောင်းတစ်ဦးက ဆိုသည်။

                  MNTV ရုပ်သံလိုင်းသည် ၂၀၁၄ခုနှစ် မတ်လမှ စတင်ကာ မီဒီယာဥပဒေအရအခွန်နှင့် အစိုးရ၊ ပြည်သူတို့အား လှည့်စားရန် ရွှေသံလွင်မီဒီယာမှခွဲထွက်ကာ ရွှေFMလက်အောက်တွင် ခရိုနီကျော်ဝင်းဇနီးအုပ်ချုပ်တည်ထောင်ကာ စတင်မိတ်ဆက်ထုတ်လွှင့်ခဲ့ခြင်းဖြစ်သည်။

သတင်းဇာနည်မီဒီယာမှ ကူးယူဖော်ပြသည်။