နည်းပညာတက္ကသိုလ် ကျောင်းသူတစ်ဦးကို သတ်ပြီး အလောင်းကို စွန့်ပစ်ခဲ့သူအား ထောင်ဒဏ် ၁၀ နှစ် ကျခံစေရန် အမိန့်ချ

အင်းစိန်မြို့နယ်အတွင်း မှော်ဘီနည်း ပညာတက္ကသိုလ် ကျောင်းသူတစ်ဦးအား သတ်၍ အလောင်းစွန့်ပစ်ခဲ့သည့် အမျိုးသားအား မေ ၃၀ ရက်တွင် မြောက်ပိုင်းခရိုင် တရားရုံး၌ ရုံးထုတ်ခဲ့သည်။

ယင်းနေ့တွင် တရားသူကြီးက ပြစ်မှုကျူးလွန်သူ သူထက်နိုင်(ခ) သူရအောင်အား ပုဒ်မ ၃၀၂ (၂) ဖြင့် အလုပ်ကြမ်းနှင့် ထောင်ဒဏ် ၁၀ နှစ် ကျခံစေရန် အမိန့်ချမှတ်ခဲ့ပြီး ချုပ်ရက်ထုတ်နုတ် ခံစားခွင့်ရှိကြောင်း သိရသည်။

ထိုသို့ အမိန့်ချမှုနှင့် ပတ်သက်၍ သေဆုံးသူ မိန်းကလေး၏ ဖခင်ဖြစ်သူက “သမီး အသတ်ခံရတာက ဒဏ်ရာ ဒဏ်ချက်တွေနဲ့ပါ။ အဲဒါကို ဥပဒေက သေနိုင်တဲ့ဒဏ်ရာ မဖြစ်ဘူး။ အချိန်မီ ပြန်ကယ်လို့ရတယ်ဆိုတဲ့ ပုံစံမျိုးပြောသွားတာကို တွေ့ရတယ်။ ဖြစ်သွားတာလည်း ရိုးရိုးတန်းတန်း ဖြစ်သွားတာ မဟုတ်ဘူး။ ကောင်လေးက သမီးကို လာခေါ်ခဲ့ပြီးနောက်ပိုင်း ဖြစ်သွားတာ။ အဲဒါကြောင့် ကြိုတင်ကြံစည်မှု ပါတယ်လို့ ထင်တယ်။

ဒါပေမဲ့ တရားဥပဒေက ဒီလို အမိန့်ချလိုက်တော့ ဦးတို့ ဘယ်လိုလုပ်ရမလဲ။ သမီးလေးကတော့ သေခဲ့ရပြီးပြီ။ အမိန့်နဲ့ပတ်သက်လို့ အထက်တရားရုံးကို ဆက်တက်လည်း ဒီလိုပဲဖြစ်မှာမို့ ဆက်မတက်တော့ပါဘူး”ဟု မေ ၃၀ ရက်တွင် မီဒီယာများကို ပြောကြားသည်။

ပြီးခဲ့သည့် ၂၀၁၆ ခုနှစ် ဇန်န၀ါရီ ၂၈ ရက် နံနက်က အင်းစိန်မြို့နယ်၊ ဥက္ကလာလမ်းမနံဘေး အမှတ် (၃၀၁၇) လေကြောင်းကာကွယ်ရေးတပ် ခြံစည်းရိုးအတွင်း နဖူးပေါက်ပြဲဒဏ်ရာ တစ်ချက်၊ ယာချိုစောင်း သွေးခြေဥဒဏ်ရာ တစ်ချက်၊ လည်ပင်းညိုမည်းဒဏ်ရာ တစ်ချက်ဖြင့် သေဆုံးနေသော မိန်း ကလေး အလောင်းကို တွေ့ရှိခဲ့ပြီး ရဲတပ်ဖွဲ့က စစ်ဆေးရာတွင် သေဆုံးသူမှာ ထောက်ကြန့်နေ အသက် ၂၂ နှစ်အရွယ်ရှိ မှော်ဘီနည်းပညာတက္ကသိုလ် ကျောင်းသူတစ်ဦးဖြစ်ကြောင်း ရဲမှုခင်းမှတ်တမ်းများအရ သိရသည်။

ထို့ပြင် ဇန်န၀ါရီ၂၆ ရက်က မ.......မှာ ၎င်း၏ ချစ်သူနှင့် ဖုန်းပြောဆိုခဲ့ပြီး ခဏနေ ပြန်လာမည်ဟု မိခင်ဖြစ်သူအားပြော၍ နေအိမ်အပြင်ဘက်သို့ ထွက်သွားခဲ့ခြင်း ဖြစ်ကြောင်း၊ ပြစ်ဒဏ် ချမှတ်ခံခဲ့ရသည့် သူထက်နိုင်မှာ မ.... ၏ နေအိမ်ရှိရာဘက်သို့ ထွက်လာခဲ့ကာ နေအိမ်အနီး အရောက်တွင် မ.... ထံသို့ ဖုန်းဆက်၍ နေပြည်တော်မှ လက်ဆောင်ပစ္စည်း ထည့်ပေးလိုက်၍ လာယူရန် ပြောကြားခဲ့ကြောင်း၊

မ....... က အပြင်သို့ ထွက်လာရာ ၎င်းက ကားဖြင့် ခေါ်ဆောင်သွားခဲ့ပြီး မင်္ဂလာဒုံမြို့နယ်၊ ရန်ကုန်ပြည်လမ်း၊ ရွှေညောင်ပင်မှတ်တိုင် အနီးရှိ လမ်းနံဘေးတွင် ကားအား ရပ်တန့်၍ စကားပြော စဉ် မ....... က လာရောက် တောင်းရမ်းရန် ပြောဆိုကြောင်း၊ ၎င်းးက သရုပ်ဆောင်သင်တန်း တက်ရမည်ဖြစ်၍ မယူနိုင်သေးဟု ပြောဆိုခဲ့ရာမှ တစ်ဆင့် စကားများရန်ဖြစ်ခဲ့ပြီး

မ....... က ၎င်း၏ ပါးကို ရိုက်ခဲ့သဖြင့် ၎င်းက ဒေါသထွက်ကာ မ...... ၏လည်ပင်းကို ၁၅ မိနစ်ခန့် ညှစ်ထားရာမှ သေဆုံးသွားခဲ့ခြင်း ဖြစ်ကြောင်း သိရသည်။

ယင်းနောက် မ...... ၏ အလောင်းကို ကားဖြင့် သယ်ဆောင်ခဲ့ပြီး အင်းစိန်မြို့နယ်၊ လေဆိပ်လမ်းဆုံ မီးပွိုင့်မှ ဥက္ကလာလမ်းဘက်သို့ မောင်းနှင်ခဲ့ကာ လေကြောင်းရန်ကာကွယ်ရေးတပ် ခြံစည်းရိုး အမှောင်ရိပ်တစ်နေရာတွင် စွန့်ပစ်ထားခဲ့သည်ဟု ထွက်ဆိုခဲ့ကြောင်း ရဲမှုခင်းမှတ်တမ်းများအရ သိရသည်။

ဝေလင်းအောင်
Eleven Media